బాబు కాళ్ల దగ్గర పెట్టారు: హరీష్

హైదరాబాద్: తెలుగుదేశం పార్టీ శాసనసభ్యుడు ఎర్రబెల్లి దయాకర రావు తెలంగాణ ఆత్మగౌరవాన్ని ఆ పార్టీ అధ్యక్షుడు నారా చంద్రబాబు నాయుడు కాళ్ల దగ్గర తాకట్టు పెట్టారని తెలంగాణ రాష్ట్ర సమితి (తెరాస) నాయకుడు హరీష్ రావు వ్యాఖ్యానించారు. తమ పార్టీ అధ్యక్షుడు కె చంద్రశేఖర రావును విమర్శించే నైతిక హక్కు దయాకర రావుకు లేదని ఆయన సోమవారం మీడియా ప్రతినిధుల సమావేశంలో అన్నారు. దమ్ముంటే ఎర్రబెల్లి దయాకర రావు తెలంగాణకు అనుకూలంగా చంద్రబాబుతో శ్రీకృష్ణ కమిటీకి నివేదిక ఇప్పించాలని ఆయన అన్నారు.

ముఖ్యమంత్రి రోశయ్యతో తెలుగుదేశం పార్టీ అధ్యక్షుడు నారా చంద్రబాబు నాయుడు కుమ్మక్కయ్యారని, శాసనసభ సమావేశాలు సజావుగా సాగించడమే దీనికి నిదర్శనమని ఆయన అన్నారు. తెలంగాణ జెఎసిలోకి కాంగ్రెసు, తెలుగుదేశం పార్టీలు మధ్యలోనే వచ్చాయి, మధ్యలోనే పోయాయని ఆయన అన్నారు. రాజీనామాలు చేస్తే తెలుగుదేశం పార్టీని తిరిగి జెఎసిలో చేర్చుకుంటామని ఆయన అన్నారు.