అసెంబ్లీలో నాగంకు రోశయ్య సవాల్

హైదరాబాద్: హైదరాబాద్ ఫ్రీజోన్ అంశంపై మాట్లాడితే కోర్టు ధిక్కారం అవుతుందని తాను అన్నట్లు రుజువు చేస్తే ముఖ్యమంత్రి పదవికి రాజీనామా చేస్తానని ముఖ్యమంత్రి రోశయ్య తెలుగుదేశం శాసనసభ్యుడు నాగం జనార్దన్ రెడ్డికి సవాల్ విసిరారు. ఒక వేళ నాగం జనార్దన్ రెడ్డిది తప్పయితే ఆయన రాజీనామా చేస్తారా అని రోశయ్య ప్రశ్నించారు. హైదరాబాద్ ఫ్రీజోన్ అంటూ సుప్రీంకోర్టు ఇచ్చిన తీర్పుపై వీరిద్దరి మధ్య బుధవారం శాసనసభలో తీవ్ర వాగ్వివాదం చెలరేగింది. ప్రతిపక్షాలు ఫ్రీజోన్ వ్యవహారంపై చర్చకు పట్టుబట్టడంతో శాసనసభలో తీవ్ర దుమారం చెలరేగింది.

హైదరాబాద్ ఫ్రీజోన్ కాదని రాజ్యాంగ సవరణ చేయాలని కేంద్రాన్ని కోరుతూ శాసనసభలో తీర్మానం చేయాలని నాగం జనార్దన్ రెడ్డి డిమాండ్ చేసిన సమయంలో ముఖ్యమంత్రి ఆగ్రహానికి గురయ్యారు. ప్రభుత్వ అసమర్థత వల్లనే సుప్రీంకోర్టు హైదరాబాద్ ఫ్రీజోన్ వ్యవహారంపై సుప్రీంకోర్టు స్పెషల్ లీవ్ పిటిషన్ ను కొట్టేసిందని ప్రతిపక్షాలు విమర్శించాయి. సిపిఎం, సిపిఐ, బిజెపి నాయకులంతా తీర్మానం కోసం పట్టుబట్టారు.