ఫ్రీ జోన్‌పై ప్రభుత్వానికి చుక్కెదురు

న్యూఢిల్లీ: రాష్ట్ర ప్రభుత్వానికి సుప్రీంకోర్టులో మంగళవారం చుక్కెదురైంది. హైదరాబాద్ ఫ్రీజోన్ వ్యవహారంపై ప్రభుత్వం దాఖలు చేసిన రివ్యూ పిటిషన్‌ను సుప్రీంకోర్టు తిరస్కరించింది. హైదరాబాద్ పోలీసు చట్టం కింద ఉద్యోగాల్లో చేరిన పోలీసులను ఇతర జిల్లాలకు బదిలీ చేయరాదంటూ సుప్రీంకోర్టు నిరుడు అక్టోబర్ 9న ఇచ్చిన తీర్పును పునస్సమీక్షించాలని రాష్ట్రప్రభుత్వం 3 నెలల క్రితం రివ్యూపిటిషన్ దాఖలు చేసింది. దీనిపై విచారించిన న్యాయమూర్తులు జీఎస్ సింఘ్వీ, ముకుందశర్మలతో కూడిన డివిజన్ బెంచ్ పిటిషన్‌ను తోసిపుచ్చింది. హైదరాబాద్ పోలీసు చట్టం కింద నియమితులైన పోలీసులను వారి జిల్లాలకు బదిలీ చేస్తూ గతంలో వైఎస్ ప్రభుత్వం ఉత్తర్వులు జారీచేసింది. దీనిపై బాధితులు హైకోర్టును ఆశ్రయించగా రాష్ట్రప్రభుత్వ నిర్ణయం సరైనదేనని హైకోర్టు తీర్పునిచ్చింది.

తమకు ప్రత్యేక కేడర్ వర్తించదంటూ బాధితులు సుప్రీంకోర్టును ఆశ్రయించారు. హైదరాబాద్ పోలీసు చట్టానికి రాష్ట్రపతి ఉత్తర్వుల నుంచి కూడా మినహాయింపు ఉన్నందువల్ల వారిని బదిలీ చేయడానికి వీల్లేదని సుప్రీంకోర్టు స్పష్టం చేసింది. నియామకం సమయంలో ఇచ్చిన నోటిఫికేషన్‌తోపాటు నియామక ఉత్తర్వుల్లో కూడా దీన్ని స్పష్టం చేసిన విషయాన్ని హైకోర్టు పరిగణనలోకి తీసుకోలేదని అభిప్రాయపడింది.