లగడపాటిని పార్టీలో ఎలా ఉంచారు: హరీష్

హైదరాబాద్: కేంద్ర, రాష్ట్ర ప్రభుత్వాలు తీసుకుంటున్న నిర్ణయాలను, కాంగ్రెసు పార్టీ అధినేత్రి సోనియా గాంధీ నాయకత్వాన్ని ప్రశ్నిస్తున్న కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ను పార్టీలో ఎలా కొనసాగిస్తున్నారని తెలంగాణ రాష్ట్ర సమితి (తెరాస) నాయకుడు హరీష్ రావు ప్రశ్నించారు. తెలంగాణపై లగడపాటికి నిజంగా ప్రేమ ఉంటే ముల్కీ నిబంధనలను అమలులోకి తీసుకురావాలని, దీని వల్ల తెలంగాణ ప్రజలందరూ తమ ప్రాంతంలో ఎక్కడైనా ఉద్యోగం చేసుకునే వీలుంటుందని ఆయన గురువారం మీడియా ప్రతినిధుల సమావేశంలో అన్నారు. ఇందుకు లగడపాటి సిద్ధంగా ఉన్నారా అని ఆయన అడిగారు.

తెలంగాణపై లగడపాటి కపట ప్రేమ చూపిస్తున్నారని ఆనయ అన్నారు. శాసనసభలో తీర్మానం చేసి చేతులు దులుపుకుంటే సరిపోదని, అఖిల పక్షాన్ని ఢిల్లీకి పంపి వెంటనే రాజ్యాంగ సవరణ జరగేలా చూడాలని ఆయన అన్నారు. ఇందుకు ఢిల్లీలో ఒక ప్రతినిధి బృందాన్ని నియోగించాలని ఆయన డిమాండ్ చేశారు.