పరారీలోని ప్రేమ జంట పోలీసులకు చిక్కింది

మహబూబ్ నగర్: గతనెలలో పారిపోయి పెళ్లిచేసుకున్న ఓ ప్రేమజంటను బుధవారం పోలీసులు తమ అదుపులోకి తీసుకున్నారు. నారాయణపేట మండలం జాజాపూర్‌ గ్రామానికి చెందిన వెంకట్‌ రెడ్డి కూతురు (16), అదే గ్రామానికి చెందిన వెంకటప్ప కుమారుడు అరిగే రవి (24)లు గతనెల16న ఇంటి నుంచి పరారయ్యారు. అనంతరం పెళ్లి చేసుకొని ఊట్కూర్‌లోని బంధువుల ఇంట్లో ఉన్నట్లు సమాచారం.

కాగా గతనెల 28న అమ్మాయి తండ్రి వెంకట్‌ రెడ్డి నారాయణపేట పోలీస్‌ స్టేషన్‌లో ఫిర్యాదు చేశాడు. ఈమేరకు విచారణ చేపడుతున్న పోలీసులకు ఊట్కూర్‌లో ఉన్నట్లు సమాచారం అందింది. దీంతో బుధవారం సాయంత్రం నారాయణపేట పోలీసులు ఊట్కూర్‌ లో తలదాచుకుంటున్న ప్రేమజంటను తమ ఆధీనంలోకి తీసుకున్నట్లు సమాచారం. ఈవిషయం అధికారికంగా పోలీసులు వెల్లడించలేదు.