పార్టీ నిర్ణయానికి కట్టుబడుదాం: సిఎం

హైదరాబాద్: హైదరాబాద్ ఫ్రీజోన్ అంశంపై పార్టీ నిర్ణయానికి కట్టుబడి ఉందామని ముఖ్యమంత్రి కె. రోశయ్య అన్నారు. ఈ అంశంపై ఆయన గురువారం ఉదయం శాసనసభలో ఫ్రీజోన్ పై తీర్మానం ప్రతిపాదించడానికి ముందు కాంగ్రెసు సీమాంధ్ర నేతలతో సమావేశమయ్యారు. ఫ్రీజోన్ అంశంపై ఆయన సీమాంధ్ర నాయకులను బుజ్జగించే ప్రయత్నం చేశారు. గతంలో ప్రభుత్వం తీసుకున్న నిర్ణయం మేరకే ఫ్రీజోన్ పై చట్ట సవరణకు శాసనసభలో తీర్మానం పెడుతున్నట్లు ఆయన తెలిపారు.

తీర్మానానికి ఆమోదం తెలిపితే తెలంగాణకు సానుకూలంగా సంకేతాలు వెళ్తాయన్ని సీమాంధ్ర నేతల వాదనతో ఆయన విభేదించారు. అటువంటిదేమీ లేదని, సభలో తీర్మానం చేసి కేంద్రానికి పంపుదామని ఆయన అన్నారు. ఎట్టకేలకు ముఖ్యమంత్రి బుజ్జగింపు ప్రయత్నాలు ఫలించాయి. వారి అంగీకారం లభించిన తర్వాతనే ముఖ్యమంత్రి శాసనసభలో తీర్మానం ప్రతిపాదించారు.