గుంటూరు షోరూంలో భారీ అగ్నిప్రమాదం

గుంటూరు: గుంటూరులో లాలాపేటలోని ఓ బట్టల దుకాణంలో శనివారం భారీ అగ్ని ప్రమాదం జరిగింది. నగరం లోని మూర్తి ఫ్యాషన్‌ షోరూంలో జరిగిన ఈ అగ్నిప్రమాదంలో సుమారు రూ.2 కోట్ల ఆస్తినష్టం జరిగినట్లు సమాచారం.

షోరూంలో మంటలు పెద్ద ఎత్తున ఎగిసిపడటంతో ఆ ప్రాంతమంతా దట్టమైన పొగ అలుముకుంది. అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చేందుకు యత్నిస్తున్నారు. ప్రమాదానికి గల కారణాలు తెలియరాలేదు. వేసవిలోగుంటూరు నగరంలో అగ్నిప్రమాదాలు జరగడం పరిపాటి. గతంలో మిర్చి యార్డులో భారీ అగ్ని ప్రమాదం సంభవించింది.