పేపర్ లీక్ కాలేదు: బోర్డు కార్యదర్శి

హైదరాబాద్: నెల్లూరులో ఇంటర్‌ ఫస్టియర్‌ ప్రశ్నాపత్రం లీకేజీ అభియోగాల వ్యవహారంపై విచారణ జరుపుతున్నట్లు ఇంటర్‌ బోర్డు కార్యదర్శి, సీనియర్ ఐఎఎస్ అధికారి బలరామయ్య తెలిపారు. శనివారం ఆయన ఇక్కడ మీడియాతో మాట్లాడుతూ లీకేజీ కుట్రను పోలీసులు భగ్నం చేశారన్నారు. ప్రశ్నాపత్రాలు విద్యార్థులకు ముందుగా చేరలేదని ఆయన అన్నారు.

కాగా లీకేజీ విషయమై కృష్ణ చైతన్య కళాశాలపై పూర్తి స్థాయిలో విచారణ జరిపి చర్యలు తీసుకుంటామని జిల్లా కలెక్టర్‌ రాంగోపాల్‌ తెలిపారు. పరీక్షలు యధావిధిగా జరుగుతాయని, విద్యార్థులు ఆందోళన చెందాల్సిన అవసరం లేదని కలెక్టర్‌ పేర్కొన్నారు. నెల్లూరులో జరిగింది లీకేజి కాదని, మాల్ ప్రాక్టీసు మాత్రమేనని జిల్లా ఎస్పీ చెప్పారు.