ఫ్రీజోన్ పై మీడియా వక్రీకరణలు: కెసిఆర్

హైదరాబాద్‌: ఫ్రీజోన్‌అంశంపై మీడియాలో కొందరు దుర్మార్గంగా వక్రీకరణలకు పాల్పడుతున్నారని తెరాస అధ్యక్షుడు కేసీఆర్‌ మండిపడ్డారు. అవహేళన చేస్తూ, పరమ ఛండాలంగా రాస్తున్నారని ఆరోపించారు. ఫ్రీజోన్‌ వివాదంకారణంగా దక్షిణ తెలంగాణలో ఉద్యమం మొదలైందని ప్రచారం చేస్తున్నారని, అవగాహన లేనివారిని అడ్డం పెట్టుకొని ఇదంతా చేస్తున్నారని విమర్శించారు. శనివారమిక్కడ పార్టీ కార్యాలయంలో 'వీరతెలంగాణ' మాసపత్రికను కేసీఆర్‌ ఆవిష్కరించారు. ఈ సందర్భంగా ఏర్పాటు చేసిన సమావేశంలో ఆయన మాట్లాడారు.

'1972లో ముల్కీ నిబంధనలకు అనుకూలంగా సుప్రీంకోర్టు ఫుల్‌బెంచ్‌ తీర్పు ఇస్తే ఆంధ్ర ప్రాంతంవారు రాష్ట్రాన్ని అగ్నిగుండంగా చేసి పార్లమెంటు చట్టసవరణ ద్వారా ముల్కీని రద్దు చేయించారు. ఇప్పుడు కేవలం శాసనసభలో తీర్మానం చేస్తే అది అప్రజాస్వామికమన్నట్లు వ్యాఖ్యానాలు చేస్తున్నారు. మీడియా అన్నది మాయాప్రపంచం. ఇప్పుడు మీడియాలో అనైతిక యుద్ధం నడుస్తోంది. ఈ పోటీలో తెలంగాణ వారు తట్టుకోలేకపోతున్నారు. మీడియాలో వస్తున్న కథనాలు చూసి తెలంగాణ రాదన్న ఆందోళనతో విద్యార్థులు ఆత్మహత్యలకు పాల్పడుతున్నారు.