రోశయ్య క్షమాపణలు చెప్పాలి: ఎర్రబెల్లి

హైదరాబాద్: తెలంగాణ ప్రజల మనోభావాలను కించే పరిచే రచన నా హృదయ స్పందన పుస్తకాన్ని ఆవిష్కరించినందుకు ముఖ్యమంత్రి కె. రోశయ్య తెలంగాణ ప్రజలకు క్షమాపణ చెప్పాలని తెలుగుదేశం నాయకుడు ఎర్రబెల్లి దయాకర రావు డిమాండ్ చేశారు. ఈ కార్యక్రమంలో పాల్గొన్న మంత్రులు కూడా తెంలగాణ ప్రజలకు క్షమాపణ చెప్పాలని ఆయన డిమాండ్ చేశారు. తెలంగాణ రాష్ట్ర ఏర్పాటు డిమాండ్ పై వివాదాస్పద వ్యాఖ్యలు చేసిన పుస్తకాన్ని ముఖ్యమంత్రి సిఎల్పీ కార్యాలయంలో ఆవిష్కరించడం సరి కాదని ఆయన సోమవారం మీడియా ప్రతినిధుల సమావేశంలో అన్నారు. ఈ పుస్తకావిష్కరణకు తెలంగాణ మంత్రులు కూడా హాజరు కావడాన్ని చూస్తే వారి నిజస్వరూపమేమిటో అర్థమవుతుందని ఆయన వ్యాఖ్యానించారు. తెలంగాణ ప్రజల మనోభావాలను కించ పరిచే విధంగా పుస్తకం రాసిన శివరాంను శిక్షించాలని ఆయన డిమాండ్ చేశారు.

ఉప ఎన్నికల్లో ఎవరూ పోటి చేయకుండా రాజ్యాంగ సంక్షోభాన్ని సృష్టిద్దామన్న ప్రజా సంఘాల ప్రతిపాదనను తమ పార్టీ స్వాగతిస్తోందని ఆయన చెప్పారు. ఉప ఎన్నికల్లో అమర వీరుల కుటుంబాలను గెలిపించాలన్న ప్రతిపాదనకు కూడా తాము మద్దతిస్తామని ఆయన చెప్పారు. ఎన్నికల్లో తెలుగుదేశం పార్టీ పోటీ చేయాలంటూ తెలంగాణ రాష్ట్ర సమితి (తెరాస) నాయకులు కోరితే తాము ఆ విషయాన్ని పరిశీలిస్తామని ఆయన చెప్పారు.