మోహన్ రెడ్డీ!రౌడీయిజం వద్దు !: జానీ

హైదరాబాద్: సభలో రౌడీలా వ్యవహరించవద్దని శాసన మండలి డిప్యూటీ చైర్మన్ మహ్మద్ జానీ సభ్యుడు మోహన్ రెడ్డిని హెచ్చరించారు. మోహన్ రెడ్డిపై సభాధ్యక్ష స్థానంలో కూర్చున్న డిప్యూటీ చైర్మన్ జానీ తీవ్ర ఆగ్రహం వ్యక్తం చేశారు. సర్వశిక్షా అభియాన్ పై చర్చ సందర్భంగా సోమవారం శాసన మండలిలో తీవ్ర దుమారం చెలరేగింది. ఈ అంశంపై చర్చ జరగాలని మోహన్ రెడ్డి పట్టుబట్టారు. దానికి జానీ నిరాకరించారు. ఈ సమయంలో ఇరువురి మధ్య వాగ్వివాదం చెలరేగింది.

డిప్యూటీ చైర్మన్ జానీ మోహన్ రెడ్డిపై ఆగ్రహం వ్యక్తం చేస్తూ మీరు చెప్తే వినాలా అంటూ రౌడీలా వ్యవహరించవద్దని హెచ్చరించారు. బయటకు వెళ్లిపోవాలని మోహన్ రెడ్డిని ఆదేశించారు. జానీ తీరుపై మోహన్ రెడ్డి తీవ్ర ఆక్షేపణ తెలిపారు. తనను రౌడీగా సంబోధించిన డిప్యూటీ చైర్మన్ బేషరతుగా క్షమాపణ చెప్పాలని ఆయన డిమాండ్ చేశారు. సభ్యుల పట్ల డిప్యూటీ చైర్మన్ తీరు మారాలని ఆయన అన్నారు.