చిరూ, కరీంనగర్ వస్తావా?: హరీష్

మెదక్: ఫ్రీజోన్ పై చర్చించేందుకు ప్రజారాజ్యం పార్టీ అధ్యక్షుడు చిరంజీవి ముందుకు రావాలని తెలంగాణ రాష్ట్ర సమితి నాయకుడు హరీష్ రావు సవాల్ చేశారు. ఈ నెల 30వ తేదీన కరీంనగర్ లో ఫ్రీజోన్ పై బహిరంగ చర్చకు రావాలని ఆయన సోమవారం మీడియా ప్రతినిధుల సమావేశంలో అన్నారు. చర్చకు చిరంజీవి మాత్రమే రావాలని, ఇతరులను పంపితే తాము అంగీకరించబోమని ఆయన అన్నారు. హైదరాబాద్ ను ఫ్రీజోన్ కాకపోతే తెలంగాణ జిల్లాల వారు కూడా నష్టపోతారని చిరంజీవి చేసిన ప్రకటనపై హరీష్ రావు తీవ్రంగా ప్రతిస్పందించారు.

కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ వక్ఫ్ భూములను అక్రమంగా సాధించుకున్నారని ఆయన ఆరోపించారు. తెలంగాణ రాష్ట్ర ఏర్పడితే ఆ భూములు పోతాయనే ఉద్దేశంతోనే తెలంగాణ రాష్ట్ర ఏర్పాటును లగడపాటి రాజగోపాల్ వ్యతిరేకిస్తున్నారని ఆయన విమర్శించారు.