నా పోటీపై సోనియాదే నిర్ణయం: డిఎస్

హైదరాబాద్: వచ్చే శాసనసభ ఉప ఎన్నికల్లో నిజామాబాద్ నియోజకవర్గం నుంచి తాను పోటీ చేయాలా, వద్దా అనే విషయంపై తమ పార్టీ అధ్యక్షురాలు సోనియా గాంధీ నిర్ణయం తీసుకుంటారని ప్రదేశ్ కాంగ్రెసు కమిటీ (పిసిసి) అధ్యక్షుడు డి శ్రీనివాస్ చెప్పారు. ఉప ఎన్నికల్లో కాంగ్రెసు పోటీ చేసే విషయంపై కూడా పార్టీ అధిష్టానమే నిర్ణయం తీసుకుంటుందని ఆయన సోమవారం మీడియా ప్రతినిధుల సమావేశంలో అన్నారు. శ్రీకృష్ణ కమిటీ విధివిధానాలకు నిరసనగా తెలంగాణ రాష్ట్ర సమితి (తెరాస) శాసనసభ్యులతో పాటు బిజెపి సభ్యుడు రాజీనామాలు చేయడంతో తెలంగాణలో 12 శాసనసభ స్థానాలకు ఉప ఎన్నికలు జరగనున్నాయి.

కాగా, పార్టీ సభ్యత్వ నమోదుపై పార్టీ శాసనసభ్యులు ఎమ్మెల్సీలతో డి శ్రీనివాస్, ప్రదేశ్ రిటర్నింగ్ అధికారి నాచియప్పన్ సమీక్ష చేపట్టారు. శాసనసభ ఆవరణలో జిల్లాలవారీగా శాసనసభ్యులు, ఎమ్మెల్సీలతో వారు భేటీ అయ్యారు. సభ్యత్వ నమోదుకు సంబంధించిన సమాచారాన్ని సాధ్యమైనంత త్వరగా అందించాలని వారు శాసనసభ్యులకు, ఎమ్మెల్సీలకు సూచించారు. మే నుంచి జరిగే పార్టీ సంస్థాగత ఎన్నికలకు పార్టీ శ్రేణులను సిద్దం చేయాలని కూడా వారు సూచించారు.