రోశయ్య మంత్రివర్గంలో వైయస్ విజయలక్ష్మి?

హైదరాబాద్: దివంగత నేత వైయస్ రాజశేఖర రెడ్డి సతీమణి వైయస్ విజయలక్ష్మిని ముఖ్యమంత్రి కె.రోశయ్య తన మంత్రివర్గంలో చేర్చుకునే అవకాశాలున్నాయి. రోశయ్య ఏప్రిల్ మొదటి వారంలో ఢిల్లీ వెళ్లి మంత్రివర్గ పునర్వ్యస్థీకరణకు, తాను తీసేయదలుచుకున్న మంత్రులు, చేర్చుకోదలుచుకున్న మంత్రుల జాబితాకు ఆయన అధిష్టానం ఆమోద ముద్ర వేయించుకునే అవకాశాలున్నాయి. ఏప్రిల్ 8వ తేదీన రోశయ్య తన మంత్రివర్గాన్ని పునర్వ్యస్థీకరిస్తారని అంటున్నారు. ఇందుకు తగిన కసరత్తును ఆయన ఇప్పటికే ప్రారంభించినట్లు చెబుతున్నారు.

కాగా, వ్యవసాయ శాఖ మంత్రి ఎన్ రఘువీరా రెడ్డిని మంత్రివర్గం నుంచి తప్పించే ఆలోచనలో రోశయ్య ఉన్నట్లు కూడా వార్తలు వస్తున్నాయి. రోశయ్యకు, రఘువీరా రెడ్డికి మధ్య సరైన సంబంధాలు లేవనే ప్రచారం జరుగుతోంది. దీంతో అనంతపురం జిల్లాకు చెందిన అదే సామాజిక వర్గానికి చెందిన సీనియర్ కు ఆయన స్థానంలో మంత్రివర్గంలో చోటు కల్పించవచ్చునని భావిస్తున్నారు. స్పీకర్ కిరణ్ కుమార్ రెడ్డి, మర్రి శశిధర్ రెడ్డి, పి. శంకరరావు, కె. జానా రెడ్డి వంటి సీనియర్లు మంత్రి పదవులపై ఆశ పెట్టుకున్నారు.