చెప్పేది మసాజ్, చేసేది వ్యభిచారం

హైదరాబాద్‌: బాడీ మసాజ్‌ పేరుతో వ్యభిచార కార్యకలాపాలు సాగిస్తున్న ముఠా గుట్టును మధ్య మండల టాస్క్‌ఫోర్స్‌ పోలీసులు బుధవారం రట్టు చేశారు. ఇద్దరు నిర్వాహకులతో పాటు సహాయకుడిని అరెస్ట్‌ చేసినట్లు డీసీపీ వీబీ కమలాసన్‌ రెడ్డి వెల్లడించారు. 3 సెల్‌ ఫోన్లు, రూ.వెయ్యి స్వాధీనం చేసుకున్నట్లు తెలిపారు. టోలిచౌకికి చెందిన ఆరిఫ్‌ గతంలో మసాజ్‌ లు చేసే వాడు. విశాఖపట్నానికి చెందిన వ్యభిచారిణి కె.లక్ష్మిఅలియాస్‌ రాణితో పరిచయమైంది. వీరిద్దరూ కలిసి అమీర్‌పేట ప్రాంతంలో ఫ్లాట్‌ అద్దెకు తీసుకున్నారు.

ఖమ్మం జిల్లాకు చెందిన అర్జున్‌ను సహాయకుడిగా పెట్టుకున్నారు. మసాజ్‌ పేరుతో తమ సెల్ ‌ఫోన్‌ నెంబరుతో సహా పత్రికల్లో ప్రకటనలిచ్చే వారు. తమను సంప్రదించిన వారితో బేరసారాలు సాగించేవారు. వివిధ ప్రాంతాల నుంచి సెక్స్‌వర్కర్లను తీసుకొచ్చి కావల్సిన వారికి పంపేవారు. ఒక్కొక్కరిపై రోజుకు రూ.3 వేల నుంచి రూ.5 వేలు సంపాదించే వారు. సమాచారం అందుకున్న మధ్య మండల టాస్క్ ‌ఫోర్స్‌ ఇన్ ‌స్పెక్టర్‌ మద్దిపాటి శ్రీనివాసరావు ఆధ్వర్యంలో దాడిచేసి ముఠా గుట్టు రట్టు చేశారు.