సుప్రీంకోర్టులో షాబుద్దీన్ కు చుక్కెదురు

న్యూఢిల్లీ: ఆర్జెడీ నాయకుడు మొహమ్మద్ షాబుద్దీన్ కు సుప్రీంకోర్టులో గురువారం చుక్కెదురైంది. వివిధ క్రిమినల్ కేసుల్లో సివాన్ జైల్లోనే తనను విచారించాలని బీహార్ ప్రభుత్వం తీసుకున్న నిర్ణయాన్ని సవాల్ చేస్తూ షాబుద్దీన్ దాఖలు చేసిన పిటిషన్ ను సుప్రీంకోర్టు తోసిపుచ్చింది. మాజీ పార్లమెంటు సభ్యుడు షాబుద్దీన్ ను జైల్లోనే విచారించాలని ప్రభుత్వం తీసుకున్న నిర్ణయాన్ని సుప్రీంకోర్టు సమర్థించింది.

విచారణ స్థలాన్ని మారుస్తూ ప్రభుత్వం, పాట్నా హైకోర్టు నోటిఫికేషన్లు జారీ చేశాయని, విచారణ వేదికను మార్చే అధికారం హైకోర్టుకు ఉందని సుప్రీంకోర్టు స్పష్టం చేసింది. అయితే, అసాధారణమైన పరిస్థితిలో తప్ప క్రిమినల్ కేసులను బహిరంగంగానే విచారించాలని సుప్రీంకోర్టు అభిప్రాయపడింది. 42 ఏళ్ల షాబుద్దీన్ 40కి పైగా క్రిమినల్ కేసుల్లో విచారణను ఎదుర్కుంటున్నారు.