ముస్లిం కోటాకు సుప్రీం కోర్టు గ్రీన్ సిగ్నల్

హైదరాబాద్: ముస్లిం రిజర్వేషన్ల విషయంలో రాష్ట్ర ప్రభుత్వానికి ఊరట లభించింది. ముస్లిం రిజర్వేషన్లకు సుప్రీంకోర్టు పచ్చ జెండా ఊపింది. ముస్లింలకు విద్య, ఉద్యోగాల్లో నాలుగు శాతం రిజర్వేషన్లు కల్పిస్తూ జారీ చేసిన ఉత్తర్వులను కొట్టేస్తూ ముస్లిం రిజర్వేషన్లు చెల్లవని హైకోర్టు ఇచ్చిన తీర్పుపై సుప్రీంకోర్టు స్టే ఇచ్చింది. ముస్లిం రిజర్వేషన్లపై కేసు విచారణను రాజ్యాంగ ధర్మాసనానికి అప్పగించింది. దీంతో ఐదుగురు న్యాయమూర్తులతో కూడిన రాజ్యాంగ ధర్మాసనం ముస్లిం రిజర్వేషన్లపై ఆగస్టు 12వ తేదీన విచారణ చేపడుతుంది.

కాగా, ముస్లిం రిజర్వేషన్లపై సుప్రీంకోర్టు కీలకమైన వ్యాఖ్యలు చేసింది. 14 వృత్తులవారికి రిజర్వేషన్లు కల్పించవచ్చునని వ్యాఖ్యానించింది. 15వ వర్గాన్ని శాస్త్రీయంగా గుర్తించాలని అభిప్రాయపడింది. ముస్లిం రిజర్వేషన్లకు కూడా క్రీమీలేయర్ వర్తిస్తుందని తెలిపింది.