బాబు అసహనం: స్పీకర్ మండిపాటు

హైదరాబాద్: ప్రతిపక్ష నాయకుడు నారా చంద్రబాబు నాయుడు, స్పీకర్ కిరణ్ కుమార్ రెడ్డికి మధ్య శాసనసభలో శనివారం తీవ్ర వాగ్వివాదం చెలరేగింది. ఉపాధి హామీ పథకంపై చర్చ సందర్భంగా ఈ సంఘటన చోటు చేసుకుంది. చంద్రబాబు అసహనం కోల్పోయారు. విషయంపై మాట్లాడాలని స్పీకర్ కిరణ్ కుమార్ రెడ్డి చెప్పడంతో చంద్రబాబు అసహనం వ్యక్తం చేశారు. తాను కూర్చోమంటే కూర్చుంటానని, మాట్లాడొద్దంటే ఊరుకుంటానని అంటూ చంద్రబాబు కూర్చుండిపోయారు. దీనిపై స్పీకర్ కిరణ్ కుమార్ రెడ్డి తీవ్రంగా ఆగ్రహం వ్యక్తం చేశారు.

చంద్రబాబు ప్రవర్తన మార్చుకోవాలని స్పీకర్ అన్నారు. చైర్ తప్పు పడుతున్నారని ఆయన అన్నారు. తాను చాలా సహనంతో వ్యవహరిస్తున్నానని ఆయన చెప్పారు. చైర్ ను చంద్రబాబు బ్లాక్ మెయిల్ చేస్తున్నారని ఆయన వ్యాఖ్యానించారు. విషయానికి పరిమితం కావాలని ఆయన చంద్రబాబుకు సూచించారు. ఈ రకంగా వ్యవహరిస్తే తానేమీ చేయలేనని ఆయన అన్నారు.