రాజకీయ తెరపై హ్యారీపోటర్ హీరో

లండన్‌: ప్రపంచ వ్యాప్తంగా సంచలనం సృష్టించిన జె.కె.రౌలింగ్‌ రచన 'హ్యారీపోటర్‌' వెండితెరపై ప్రత్యక్షమై చిన్నారిలోకానికి మరింత చేరువయింది. హ్యారీపోటర్‌ పాత్రలో డానియల్‌ రాడ్‌క్లిఫ్‌ అభినయం చిన్నా, పెద్ద అందరినీ విశేషంగా ఆకట్టుకుంది. నిన్నా మొన్నటి వరకూ హ్యారీపోటర్‌ సిరీస్‌ చిత్రాలలో అందరినీ అబ్బురపరిచిన రాడ్‌క్లిఫ్‌ ఇప్పుడు రాజకీయ పాఠాలు నేర్చుకుంటున్నాడు.

సహజంగానే రాజకీయాలంటే ఆసక్తి కనబరిచే రాడ్‌క్లిఫ్‌ ఇప్పుడు బ్రిటన్‌లోని ఓ రాజకీయ పార్టీకి అంబాసిడర్‌గా వ్యవహరించడానికి ఒప్పందం కుదుర్చుకున్నాడు. రాజకీయాల్లో చేరే విషయమై విలేకర్లు ప్రశ్నించగా, భవిష్యత్తులో ఏం జరుగుతుందో ఎవరు చెప్పగలరని గడుసుగా సమాధానం ఇచ్చాడు.