హైదరాబాద్ పాతబస్తీలో కర్ప్యూ

హైదరాబాద్: అల్లర్లు చెలరేగిన హైదరాబాద్ పాత బస్తీలో సోమవారం రాత్రి ఏడు గంటల నుంచి కర్ఫ్యూ విధించనున్నట్లు సమాచారం. అల్లర్లు అదుపులోకి రాకపోవడంతో పోలీసు శాఖ ఈ నిర్ణయం తీసుకుంది. ఈ విషయాన్ని హైదరాబాద్ నగర పోలీసు కమిషనర్ ఎకె ధ్రువీకరించారు. హైదరాబాదులోని సౌత్ జోన్ లోని 11 పోలీసు స్టేషన్ల పరిధిలో ఈ కర్ఫ్యూ అమలులో ఉంటుంది. కర్ఫ్యూ రాత్రిపూటనే విధిస్తారా, పగలు కూడా ఉంటుందా అనేది తెలియడం లేదు. పాతబస్తీలో కత్తిపోటు సంఘటనలు, పోలీసుల కాల్పులు చోటు చేసుకుంటున్నాయి. పరిస్థితి ఉద్రిక్తంగా మారింది. బస్సులపై దాడులు జరుగుతుండడంతో వాటిని ఆపేశారు. పాతబస్తీకి వెళ్లి దారులను మూసేసే అవకాశం ఉంది. పాతబస్తీ అల్లర్లపై కేంద్ర హోం శాఖ ఆరా తీసింది. కేంద్రం నుంచి అదనపు బలగాలు కూడా వచ్చాయి.

ఆందోళనకారులు రోడ్లపైకి వచ్చి రాళ్లు రువ్వుకున్నారు. ఆందోళనకారులను చెదరగొట్టడానికి పోలీసులు భాష్పవాయువు గోళాలు ప్రయోగించారు. కొన్ని చోట్ల పోలీసులు లాఠీచార్జీ కూడా చేశారు. పాతబస్తీ అల్లర్లలో ఒక పోలీసు కానిస్టేబుల్ సహా నలుగురు గాయపడ్డారు. ర్యాపిడ్ యాక్షన్ ఫోర్స్ ను, ఆక్టోపస్ ను రంగంలోకి దించారు. మధ్యాహ్నం వరకు అదుపులో ఉన్నట్లు అనిపించిన పరిస్థితి మళ్లీ వేడెక్కింది.