లగడపాటి కేసు ఏప్రిల్ ఒకటికి వాయిదా

న్యూఢిల్లీ: రాష్ట్ర ఒలింపిక్ సంఘం అధ్యక్షుడిగా కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ఎన్నికపై విచారణను సుప్రీంకోర్టు సోమవారం ఏప్రిల్ ఒకటవ తేదీకి వాయిదా వేసింది. తన ఎన్నిక చెల్లదంటూ హైకోర్టు ఇచ్చిన తీర్పును సవాల్ చేస్తూ లగడపాటి రాజగోపాల్ సుప్రీంకోర్టుకు వెళ్లారు. ఈ కేసు విచారణను సుప్రీంకోర్టు ఏప్రిల్ 1వ తేదీకి వాయిదా వేసింది.

ఒలింపిక్ సంఘం ఎన్నికల సమయంలో లగడపాటి వర్గం దౌర్జన్యానికి దిగి ఫలితాన్ని ప్రభావితం చేసిందని ఆరోపిస్తూ మరో కాంగ్రెసు పార్లమెంటు సభ్యుడు వి హనుమంతరావు వర్గం హైకోర్టును ఆశ్రయించింది. దీనిపై విచారణ జరిపిన హైకోర్టు ఒలింపిక్ సంఘం అధ్యక్షుడిగా లగడపాటి ఎన్నిక చెల్లదని తీర్పు చెప్పింది. ఈ తీర్పును లగడపాటి రాజగోపాల్ సుప్రీంకోర్టులో సవాల్ చేశారు.