టిడిపి పగ్గాలు బాలయ్యకివ్వాలి: లక్ష్మీపార్వతి

హైదరాబాద్: తెలుగుదేశం పార్టీ అధ్యక్ష పదవిని సినీ నటుడు, ఎన్టీ రామారావు తనయుడు బాలకృష్ణకు అప్పగించాలని ఎన్టీ రామారావు భార్య, ఎన్టీఆర్ తెలుగుదేశం పార్టీ అధ్యక్షురాలు లక్ష్మీపార్వతి సూచించారు. పార్టీ అధ్యక్ష పదవిని బాలకృష్ణకు ఇస్తే పార్టీ దశ మారుతుందని ఆమె అభిప్రాయపడ్డారు. తెలుగుదేశం పార్టీ ఆవిర్భావ దినోత్సవం సందర్బంగా ఆమెను సాక్షి చానెల్ ఇంటర్వ్యూ చేసింది. చంద్రబాబు తప్పుకుని బాలయ్యను ముందు పెట్టి పార్టీని నడిపించాలని ప్రజలు కోరుకుంటున్నారని ఆమె అన్నారు. పార్టీలోని నాయకులతో సహా 99 శాతం మంది ఇదే అభిప్రాయంతో ఉన్నారని ఆమె అన్నారు.

అధికారం కోసమే పుట్టిన చంద్రబాబు బాలయ్యకు పార్టీ అధ్యక్ష పదవిని అప్పగించే అవకాశాలు లేవని ఆమె అన్నారు. బాలకృష్ణకు రాజకీయానుభవం లేదనే విషయాన్ని గుర్తు చేయగా స్వర్గీయ ఎన్టీ రామారావుకు కూడా పార్టీని పెట్టినప్పుడు రాజకీయానుభవం లేదనే విషయాన్ని గుర్తు చేసుకోవాలని ఆమె అన్నారు. ఎన్టీఆర్ ఆశయాలను కొనసాగించేవారే ఎన్టీఆర్ కు వారసులని ఆమె అన్నారు. సిద్ధాంతాలను నిలబెట్టే గలిగేవాల్లు నిజమైన వారసులని ఆమె అభిప్రాయపడ్డారు.