'నెల్లూరు మేయర్ కనబడుట లేదు'

నెల్లూరు: నగర మేయర్‌ నందిమండలం భానుశ్రీ 20 రోజులుగా కనిపించడంలేదంటూ నెల్లూరు నగర తెలుగుదేశం పార్టీ నేతలు, కార్పొరేటర్లు పోలీసులకు ఫిర్యాదు చేశారు. ఈ మేరకు ఆదివారం నెల్లూరు నాలుగో నగర ఎస్సై వేమారెడ్డికి ఫిర్యాదు పత్రాన్ని సమర్పించారు. అంతకుముందు జిల్లా తెలుగుదేశం పార్టీ కార్యాలయంలో పార్టీ నగర అధ్యక్షుడు కిలారి వెంకటస్వామి నాయుడు విలేకరులతో మాట్లాడారు. నగర ప్రజలు వివిధ రకాల సమస్యలతో ఇబ్బందులు ఎదుర్కొంటుంటే మేయర్‌ భానుశ్రీ మాత్రం స్వంత పనుల్లో మునిగి తేలుతున్నారని ఆరోపించారు.

మేయర్‌ కార్పొరేషన్‌కు రాకపోవడంతో పాలన స్థంభించిపోయిందన్నారు. నిబంధనల ప్రకారం మేయర్‌ కొద్ది రోజుల పాటు పాలనకు దూరమయితే బాధ్యతలను డెప్యూటీ మేయర్‌కు అప్పగించాల్సి ఉందన్నారు. నెల్లూరులో మాత్రం ఆ పరిస్థితి కనిపించడం లేదన్నారు. ఆమె వెంటనే తన బాధ్యతలను డెప్యూటీ మేయర్‌కు అప్పగించాలని డిమాండ్‌ చేశారు. స్టాండింగ్‌ కమిటీ సమావేశాలతో పాటు, సాధారణ కౌన్సిల్‌ సమావేశాలను కూడా నిర్వహించకపోవడం దురదృష్టకరమని పేర్కొన్నారు. పాలకుల తీరుతో నెల్లూరు నగర పాలక సంస్థలో పాలన స్థంభించిందన్నారు.