జాతీయ పార్టీగా టిడిపి: ఢిల్లీకి చంద్రబాబు?

హైదరాబాద్: తెలుగుదేశం పార్టీని జాతీయ పార్టీగా మార్చే ఆలోచన సాగుతోంది. ఈ విషయంపై పార్టీలో అంతర్గతంగా చర్చ సాగుతోంది. మారుతున్న పరిస్థితుల నేపథ్యంలో పార్టీని జాతీయ పార్టీగా మార్చాలని పార్టీ అధ్యక్షుడు నారా చంద్రబాబు నాయుడు ఆలోచిస్తున్నట్లు సమాచారం. తెలుగువారంతా కలిసి ఉండాలనేది తెలుగుదేశం లక్ష్యం. అయితే, రాష్ట్ర విభజన ఖాయమనే ఉద్దేశంతో చంద్రాబాబు ఉన్నట్లు సమాచారం. దీంతో కలిసి ఉండాలనే లక్ష్యాన్ని పక్కన పెట్టి తెలుగువారు ఎక్కుడున్నా వారి మేలే తమ లక్ష్యమని ప్రకటించుకోవడానికి తెలుగుదేశం పార్టీ సిద్ధమవుతున్నట్లు సమాచారం. పార్టీ 29వ ఆవిర్భావ దినోత్సవం సందర్భంగా సోమవారం నాడు పోలిట్ బ్యూరో సమావేశం కానుంది.

రాష్ట్ర విభజన జరిగితే చంద్రబాబు సీమాంధ్ర రాష్ట్రానికో, తెలంగాణ ప్రాంతానికో పరిమితం కావాలని అనుకోవడం లేదు. ఆంధ్రప్రదేశ్ ముఖ్యమంత్రిగా పనిచేసిన చంద్రబాబు సీమాంధ్ర రాష్ట్రానికో, తెలంగాణ రాష్ట్రానికో ముఖ్యమంత్రిగా ఉండాలని అనుకోవడం లేదని అంటున్నారు. ఈ స్థితిలో దేశ రాజకీయాల్లో కీలక పాత్ర వహించాలని ఆయన భావిస్తున్నట్లు పార్టీ వర్గాలు చెబుతున్నాయి. ఈ కారణంగా తెలుగుదేశం పార్టీని జాతీయ పార్టీగా మార్చేసి ఢిల్లీ స్థాయిలో రాజకీయాలు నడపాలనేది ఆయన ఉద్దేశమని చెబుతున్నారు. ఇదే సమయంలో తెలంగాణలోనూ సీమాంధ్రలోనూ పార్టీని బలోపేతం చేసే విధంగా వ్యవహరించాలని ఆయన అనుకుంటున్నారు. తెలుగుదేశం పార్టీని జాతీయ పార్టీగా మార్చే విషయంపై పార్టీ పోలిట్ బ్యూరో సమావేశంలో నిర్ణయం తీసుకునే అవకాశం ఉందని పార్టీ వర్గాలంటున్నాయి.