స్పీకర్ పై చంద్రబాబు అసహనం

హైదరాబాద్: శాసనసభ స్పీకర్ కిరణ్ కుమార్ రెడ్డిపై ప్రతిపక్ష నేత నారా చంద్రబాబు నాయుడు మరోసారి అసహనం వ్యక్తం చేశారు. స్పీకర్ తీరుపై ఆయన మంగళవారం శాసనసభలో తీవ్ర వ్యాఖ్యలు చేశారు. తాను మాట్లాడుతుంటే స్పీకర్ పదే పదే అడ్డు తగులుతున్నారని ఆయన ఆరోపించారు. అది మంచి పద్థతి కాదని ఆయన స్పీకర్ తో అన్నారు. తానేమే అడ్డుపడడం లేదని స్పీకర్ కిరణ్ కుమార్ రెడ్డి చెప్పినా చంద్రబాబు వినిపించుకోలేదు. మీకేమైనా ఇబ్బంది ఉంటే చెప్పండి, గమ్మున కూర్చుంటాం అని ఆయన అన్నారు. తనకేమీ ఇబ్బంది లేదని స్పీకర్ చెప్పారు.

తాము హద్దులు దాటడం లేదని, సహకరించాలని తాము స్పీకర్ ను కోరుతున్నామని, అయితే పదే పదే ముంగించడంటూ స్పీకర్ అంటున్నారని, ఇది సరి కాదని చంద్రబాబు అన్నారు. హైదరాబాద్ అల్లర్లపై ముఖ్యమంత్రి ప్రకటన చేసిన తర్వాత స్పందించే హక్కు, అధికారం తమకు ఉన్నాయని ఆయన చెప్పారు. తనను అపార్థం చేసుకోవద్దని, స్పీకర్ బాధపెట్టే విధంగా మాట్లాడుతున్నారని ఆయన అన్నారు. తాను ఎంత మాట్లాడాలో అంతే మాట్లాడుతున్నామని, ముఖ్యమంత్రి మాట్లాడుతుంటే సహకరించామని ఆయన చెప్పారు.