అలా అనేవారు ఉన్మాదులు: లగడపాటి

న్యూఢిల్లీ: హైదరాబాద్ పాతబస్తీ అల్లర్ల వెనక సీమాంధ్ర నాయకుల కుట్ర ఉందనే తెలంగాణ రాష్ట్ర సమితి (తెరాస) వ్యాఖ్యలను కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ఖండించారు. హైదరాబాద్ పాతబస్తీ అల్లర్ల వెనక సీమాంధ్ర నాయకుల కుట్ర ఉందని ఉన్మాదులు మాత్రమే అనగలరని ఆయన మంగళవారం మీడియా ప్రతినిధులతో అన్నారు. చౌకబారు ప్రచారం కోసం అలాంటి ప్రకటనలు చేస్తున్నారని ఆయన వ్యాఖ్యానించారు. ముఖ్యమంత్రి రోశయ్య ప్రభుత్వాన్ని అస్థిర పరచడం వల్ల జరిగే లాభం ఎవరికని ఆయన అడిగారు.

మత కలహాలను సృష్టించి ప్రయోజనం పొందడం బిజెపికి అలవాటేనని ఆయన అన్నారు. బిజెపి లాభపడే పరిస్థితి ఉన్నప్పుడు సొంత పార్టీవారే సీమాంధ్ర నేతలపై విమర్శలు చేయడం విచారకరమని ఆయన కాంగ్రెసు పార్లమెంటు సభ్యుడు మధుయాష్కీ, కాంగ్రెసు శాసనసభ్యుడు పి. శంకరరావు చేసిన ప్రకటనలను ఉద్దేశించి అన్నారు. రాష్ట్రం విడిపోతే పాతబస్తీలో జరుగుతున్న పరిణామాల వంటివి మరిన్ని జరుగుతాయని తాను ఎప్పుడో చెప్పినట్లు ఆయన గుర్తు చేశారు.