గుంటూరు జిల్లా బాపట్లలో లాకప్ డెత్?

గుంటూరు: గుంటూరు జిల్లా బాపట్ల రూరల్ పోలీసు స్టేషన్ లో నాగిరెడ్డి అనే వ్యక్తి మరణంపై అనుమానాలు వ్యక్తమవుతున్నాయి. పోలీసుల చిత్రహింసల వల్లనే నాగిరెడ్డి మరణించినట్లు ఆయన బంధువులు ఆరోపిస్తున్నారు. నాగిరెడ్డి మృతదేహాన్ని గుట్టు చప్పుడు కాకుండా మార్చురీకి తరలించారు. నాగిరెడ్డి ఆత్మహత్య చేసుకున్నాడని, ఉరేసుకుని అతను మరణించాడని పోలీసులు చెబుతున్నారు. అయితే, పోలీసుల తీరు అనుమానాలకు తావిస్తోంది. శవాన్ని చూడడానికి మీడియాను పోలీసులు అనుమతించడం లేదు.

ఒక అమ్మాయిని వేధించిన కేసులో నాగిరెడ్డి నిందితుడు. గ్రామంలోని ఓ అమ్మాయిని వేధించడంతో గ్రామస్తులు నాగిరెడ్డిని పట్టుకుని పోలీసులకు అప్పగించారు. పోలీసులు కేసు నమోదు చేసి నాగిరెడ్డిని అరెస్టు చేశారు. నాగిరెడ్డిని సోమవారం రాత్రి ఓ గదిలో పెట్టారు. అతను మంగళవారం తెల్లారి శవమై తేలాడు.