శ్రీకృష్ణ కమిటీ సమైక్యాంధ్రకు అనుకూలం: జెసి

న్యూఢిల్లీ: రాష్ట్ర పరిస్థితిపై వేసిన జస్టిస్ శ్రీకృష్ణ కమిటీపై కాంగ్రెసు రాయలసీమ సీనియర్ శాసనసభ్యుడు సంచలన వ్యాఖ్యలు చేశారు. కాగా, మరో కాంగ్రెసు రాయలసీమ శాసనసభ్యుడు టిజి వెంకటేష్ తెలంగాణ వలసలపై వివాదాస్పద వ్యాఖ్యలు చేశారు. శ్రీకృష్ణ కమిటీ సమైక్యాంధ్రకు అనుకూలంగా ఉందని, సభ్యులంతా సమైక్యాంధ్రకు అనుకూలంగా ఉన్నారని జెసి దివాకర్ రెడ్డి అన్నారు. టిజీ వెంకటేష్, ఏరాసు ప్రతాపరెడ్డిలతో కలిసి ఆయన సీమాంధ్ర కాంగ్రెసు శాసనసభ్యుల తరఫున గురువారం శ్రీకృష్ణ కమిటీకి నివేదికను అందజేశారు. జెసి దివాకర్ రెడ్డి ప్రకటన తెలంగాణ ప్రజల్లో తీవ్ర ఆగ్రహం కలిగిస్తోంది.

కాగా, కోట్ల రూపాయల సంపాదన కోసం తెలంగాణ నుంచి గల్ఫ్ కు వలసలు పోతున్నారని టిజి వెంకటేష్ వ్యాఖ్యానించారు. సీమాంధ్ర నుంచి పొట్ట కూటి కోసం వలసలు పోతున్నారని ఆయన అన్నారు. తాము సీమాంధ్ర తరఫున 150 పేజీల నివేదికను శ్రీకృష్ణ కమిటీకి అందజేసినట్లు ఆయన తెలిపారు. ఉన్నత పదవుల్లో ఎక్కువ మంది తెలంగాణవారే ఉన్నారని ఆయన అన్నారు. రాష్ట్ర బడ్జెట్ లో ఎక్కువ శాతం ప్రభుత్వం హైదరాబాదుపైనే ఖర్చు చేసిందని ఆయన అన్నారు.