సీమాంధ్ర నేతలను పట్టించుకోం: నాగం

హైదరాబాద్: తాము సీమాంధ్ర నేతల వ్యాఖ్యలను పట్టించుకోబోమని తెలుగదేశం తెలంగాణ ఫోరం కన్వీనర్ నాగం జనార్దన్ రెడ్డి అన్నారు. రాషట్ర్ విభజన జరగదనే సీమాంధ్ర నాయకుల వ్యాఖ్యలను తాము పట్టించుకోవడం లేదని ఆయన అన్నారు. తెలుగుదేశం తెలంగాణ ప్రాంత నేతల సమావేశం అనంతరం ఆయన గురువారం మీడియా ప్రతినిధులతో మాట్లాడారు. ఈ నెల 8వ తేదీన శ్రీకృష్ణ కమిటీకి తమ నివేదికను అందిస్తామని ఆయన చెప్పారు.

ఈ నెల 4వ తేదీన పార్టీ తెలంగాణ ప్రాంత పోలిట్ బ్యూరో సభ్యులు, పార్టీ జిల్లా అధ్యక్షులతో సమావేశమవుతామని ఆయన చెప్పారు. శ్రీకృష్ణ కమిటీకి సమర్పించే నివేదికపై ఈ సమావేశంలో నిర్ణయం తీసుకుంటామని ఆయన చెప్పారు. తాము 200 పేజీల నివేదికను రూపొందించినట్లు ఆయన తెలిపారు. పార్టీ సభ్యత్వ నమోదు కార్యక్రమాన్ని కొనసాగిస్తూనే తెలంగాణ కోసం ఈ ప్రాంతంలో 119 శాసనసభా నియోజకవర్గాల్లో ఉద్యమాలు చేస్తామని ఆయన చెప్పారు.