రోశయ్యా!దిగిపో !: చంద్రబాబు డిమాండ్

హైదరాబాద్: ధరలు తగ్గించడం చేతకాకపోతే అధికారం నుంచి దిగిపోవాలని తెలుగుదేశం పార్టీ అధ్యక్షుడు నారా చంద్రబాబు నాయుడు ముఖ్యమంత్రి రోశయ్యను డిమాండ్ చేశారు. ధరలను అదుపు చేయడంలో కేంద్ర, రాష్ట్ర ప్రభుత్వాలు విఫలమయ్యాయని ఆయన విమర్శించారు. కొంత మంది పార్టీలో చేరిన సందర్భంగా ఆయన శుక్రవారం ప్రసంగించారు. ధరలు తగ్గించడం చేత కాకపోతే కేంద్ర, రాష్ట్ర ప్రభుత్వాలు దిగిపోవాలని, అంతే గానీ పేదవాడికి అన్యాయం చేయవద్దని ఆయన అన్నారు. మైనారిటీలకు రిజర్వేషన్లు ఇవ్వాల్సిందేనని, దీని కోసం తమ పార్టీ పోరాటం చేస్తుందని ఆయన అన్నారు.

రాజకీయ పబ్బం గడుపుకోవడానికే హైదరాబాదులో కాంగ్రెసు నాయకులు మత కలహాలకు ఆజ్యం పోశారని ఆయన ఆరోపించారు. కాంగ్రెసు అంతర్గత కలహాలతో పేదవాడి జీవితంతో ఆడుకుంటోందని ఆయన వ్యాఖ్యానించారు. హైదరాబాదులో ఇప్పుడు రౌడీ రాజ్యం నడుస్తోందని ఆయన అన్నారు. తమ పార్టీ ప్రభుత్వ హయాంలో రౌడీలు నగరం విడిచి పారిపోయారని, ఇప్పుడు తిరిగి నగరంలో రౌడీలు చెలరేగిపోతున్నారని ఆయన అన్నారు.