నాపై పనిభారం పెరిగింది: రోశయ్య

హైదరాబాద్: తనపై పని భారం పెరిగిందని ముఖ్యమంత్రి కె. రోశయ్య అన్నారు. ఆయన శుక్రవారం హైదరాబాదులోని ఖైరతాబాదులో గల వాసవి సేవా కేంద్రం అతిథి గృహాల నూతన భవనాలను ప్రారంభించారు. ఈ సందర్భంగా ఆయన మాట్లాడారు. పని భారం వల్ల తాను అన్ని కార్యక్రమాల్లో పాల్గొనలేకపోతున్నానని, దీని వల్ల దూరం అవుతున్నానని భావించవద్దని ఆయన అన్నారు.

అన్ని పనులు ప్రభుత్వమే చేయాలని అనుకోకూడదని, కొన్ని పనులు స్వచ్ఛంద సంస్థలు చేయాలని ఆయన అన్నారు. ఇటువంటి సేవా కార్యక్రమాలకు తన సహకారం ఉంటుందని ఆయన అన్నారు. స్వచ్ఛంద సేవా కార్యక్రమాలకు ప్రభుత్వ ప్రోత్సాహం ఎల్లవేళలా ఉంటుందని ఆయన అన్నారు. సమాజ శ్రేయస్సుకు వాసవి సేవా కేంద్రం చేస్తున్న కృషిని ఆయన ప్రశంసించారు.