రాజీనామా ఆలోచనే లేదు: జయసుధ

హైదరాబాద్: శాసనసభ్యత్వానికి రాజీనామా చేసే ఆలోచనే లేదని కాంగ్రెసు సికింద్రాబాద్ శాసనసభ్యురాలు జయసుధ స్పష్టం చేశారు. ఒక ప్రైవేట్ తెలుగు టీవీ చానెల్ తో ఆమె శనివారం ఉదయం మాట్లాడారు. రాజీనామా చేసే ఆలోచన ఉంటే తప్పకుండా మీడియా ముందుకు వస్తానని ఆమె చెప్పారు. అయితే రాజకీయాల్లో ఇమడలేని పరిస్థితి మాత్రం ఉందని ఆమె అన్నారు. స్థానిక రాజకీయ ఒత్తిళ్లకు ఆమె తీవ్ర మనస్తాపానికి గురవుతున్నట్లు సమాచారం.

కాగా, మంత్రి పదవి కోసం జయసుధ ప్రయత్నిస్తున్నట్లు ఆ టీవీ చానెల్ వ్యాఖ్యానించింది. జయసుధ మీడియాతో మాట్లాడడానికి ఇష్టపడడం లేదని, ఎవరో ఏదో రాస్తే తానెందుకు స్పందించాలని ఆమె అన్నట్లు చెబుతున్నారు. దివంగత నేత వైయస్ రాజశేఖర రెడ్డి ప్రోద్బలంతో రాజకీయాల్లోకి వచ్చిన జయసుధ రాజకీయాల్లో ఒత్తిళ్లను మాత్రం తట్టుకోలేకపోతున్నట్లు స్పష్టమవుతోంది.