రాజకీయాలకు జయసుధ గుడ్ బై?

హైదరాబాద్: సికింద్రాబాద్ కాంగ్రెసు శాసనసభ్యురాలు జయసుధ రాజకీయాల నుంచి తప్పుకోవాలని నిర్ణయం తీసుకున్నట్లు సమాచారం. ఆమె తన శాసనసభ సభ్యత్వానికి కూడా రాజీనామా చేస్తారని అంటున్నారు. ఈ నెలాఖరున ఆమె తన రాజీనామా లేఖను స్పీకర్ కిరణ్ కుమార్ రెడ్డికి అందజేస్తారని సమాచారం. రాజకీయాలతో విసిగి పోయిన ఆమె ఆ నిర్ణయం తీసుకున్నట్లు తెలుస్తోంది. ఇది వరకు రెండు, మూడు సార్లు ఆమె రాజకీయాల పట్ల తీవ్ర అసంతృప్తిని వ్యక్తం చేశారు. రాజకీయాల్లో ఇమడడం కష్టమనే అభిప్రాయం కూడా వ్యక్తం చేశారు.

దివంగత నేత వైయస్ రాజశేఖర రెడ్డి ప్రోద్బలంతో అనూహ్యంగా ఆమె రాజకీయాల్లోకి ప్రవేశించారు. సికింద్రాబాద్ శాసనసభా నియోజక వర్గం నుంచి పోటీ చేసి గెలుపొందారు. తెలుగుదేశం సీనియర్ నాయకుడు తలసాని శ్రీనివాస యాదవ్ ను అనూహ్యంగా ఓడించి శాసనసభలో అడుగు పెట్టారు. అయితే ఆమె రాజకీయాల్లో ఇమడలేకపోతున్నట్లు తెలుస్తోంది. రాజకీయాల నుంచి తప్పుకుని ఆమె తిరిగి టాలీవుడ్ లో ప్రవేశిస్తారని చెబుతున్నారు. హీరోయిన్ గా కాలం చెల్లినా ఆమె విభిన్నమైన పాత్రలు పోషిస్తూ వచ్చారు. తిరిగి తన మాతృ రంగం మీద ఆమె దృష్టి పెడతారని అంటున్నారు.