అల్లర్ల గుట్టు జెసికి తెలుసు: నారాయణ

హైదరాబాద్: హైదరాబాద్ అల్లర్ల గుట్టు కాంగ్రెసు శాననసభ్యుడు జెసి దివాకర్ రెడ్డికి తెలుసునని సిపిఐ రాష్ట్ర కార్యదర్శి కె. నారాయణ వ్యాఖ్యానించారు. అల్లర్ల వెనక కుట్రదారులెవరో, ఎవరి పాత్ర ఉందో జెసికి తెలుసునని ఆయన శనివారం మీడియా ప్రతినిధులతో అన్నారు. అల్లర్ల వెనక కుట్ర ఉందని, ముఖ్యమంత్రి కె. రోశయ్యకు వ్యతిరేకంగా పనిచేస్తున్నవారు అల్లర్ల వెనక ఉన్నారని జెసి పదే పదే అంటుండాన్ని గుర్తు చేస్తూ ఏ ఆధారం లేకుండా జెసి అంత మాట అనబోరని ఆయన అన్నారు.

జెసి దివాకర్ రెడ్డికి నార్కో అనాలిసిస్ పరీక్షలు చేస్తే వాస్తవాలు బయటపడతాయని, కుట్రదారులెవరో తెలుస్తుందని ఆయన అన్నారు. నిఘా వ్యవస్థ వైఫల్యం, పోలీసుల నిర్లక్ష్యం హైదరాబాద్ అల్లర్లకు కారణమని ఆయన అన్నారు. రోశయ్యకు వ్యతిరేకంగా తెలుగుదేశం గానీ వామపక్షాలు గానీ పని చేసే అవకాశం లేదని, కాంగ్రెసువారే పని చేసే అవకాశం ఉంటుందని, అందువల్ల అల్లర్ల కుట్రదారులు బయపడాలంటే జెసికి నార్కో అనాలిసిస్ పరీక్షలు నిర్వహించడం అవసరమని ఆయన అన్నారు.