పెళ్లి సానియా వ్యక్తిగతం: ఉద్ధవ్ థాకరే

ముంబై: భారత టెన్నిస్ క్రీడాకారిణి సానియా మీర్జా పాకిస్తాన్ క్రికెటర్ షోయబ్ మాలిక్ ను పెళ్లి చేసుకోవాలని తీసుకున్న నిర్ణయాన్ని తప్పు పట్టిన శివసేన శనివారం యు - టర్న్ తీసుకుంది. సానియా, షోయబ్ ల పెళ్లి వారి వ్యక్తిగతమని శివసేన ఎగ్జిక్యూటివ్ ప్రెసిడెంట్ ఉద్ధవ్ థాకరే అన్నారు. సానియా - షోయబ్ ల పెళ్లిపై తమ అధికారిక పత్రిక సామ్నాలో ఇప్పటికే పార్టీ వైఖరిని చెప్పామని ఆయన శనివారం మీడియా ప్రతినిధులతో అన్నారు.

సానియా మీర్జా ఎవరిని పెళ్లి చేసుకున్నా తమకేమీ అభ్యంతరం లేదని, అది ఆమె వ్యక్తిగతమని, జీవిత భాగస్వామిని ఎంపిక చేసుకునే హక్కు ఆమెకు ఉందని ఆయన అన్నారు. సానియా ఎవరిని పెళ్లి చేసుకున్నా తమకేమీ అభ్యంతరం లేదంటూ మీకేమైనా అభ్యంతరమా అని ఆయన మీడియా ప్రతినిధులను ప్రశ్నించారు. సానియా పాకిస్తాన్ కు చెందిన షోయబ్ మాలిక్ ను పెళ్లి చేసుకోవాలనే నిర్ణయాన్ని శుక్రవారం సామ్నా సంపాదకీయంలో శివసేన తీవ్రంగా వ్యతిరేకించిన విషయం తెలిసిందే. సానియా, షోయబ్ లపై తీవ్ర వ్యాఖ్యలు కూడా చేసింది.