సోనియా గాంధీతో డిఎస్ భేటీ

న్యూఢిల్లీ: పార్టీ అధ్యక్షురాలు సోనియా గాంధీతో ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ శనివారం సమావేశమయ్యారు. పార్టీ తరఫున శ్రీకృష్ణ కమిటీకి ఇచ్చే నివేదికపై శ్రీనివాస్ సోనియా గాంధీతో ఏమైనా మాట్లాడారా, లేదా అనే విషయం తెలియడం లేదు. శ్రీకృష్ణ కమిటీకి నివేదికలు సమర్పించే గడువు శనివారంతో ముగుస్తోంది. పార్టీ తరఫున నివేదికను శ్రీకృష్ణ కమిటీకి తానే నివేదికను సమర్పిస్తానని శ్రీనివాస్ గతంలో చెప్పారు. కానీ అది జరుగుతుందా, లేదా అనేది అనుమానంగానే ఉంది. అయితే శ్రీకృష్ణ కమిటీ గడువు ముగిసినా రెండు రోజుల పాటు నివేదికలు తీసుకోవడానికి తన సంసిద్ధతను వ్యక్తం చేసింది. దీనికి సంబంధించి డిఎస్ సోనియాతో మాట్లాడారా, లేదా అనేది తెలియడం లేదు.

సోనియా గాంధీతో ఆయన రాష్ట్ర రాజకీయాలపై చర్చించినట్లు తెలుస్తోంది. నామినేటెడ్ పోస్టుల భర్తీపై, మూడు ఎమ్మెల్సీ స్థానాలకు జరిగే ఎన్నికలపై ఆయన మాట్లాడినట్లు సమాచారం. తెలంగాణలో 12 శాసనసభా నియోజకవర్గాలకు జరిగే ఉప ఎన్నికలపై కూడా ఆయన తన అభిప్రాయాన్ని వినిపించినట్లు తెలుస్తోంది. కాగా, డి. శ్రీనివాస్ ఎమ్మెల్సీ ఎన్నికల్లోనైనా, శాసనసభ ఉప ఎన్నికల్లోనైనా పోటీ చేయాలని అనుకుంటున్నట్లు వార్తలు వస్తున్నాయి. దీనిపై ఆయన సోనియాతో మాట్లాడి ఉండవచ్చునని అంటున్నారు.