మరో రెండేళ్లలో పెళ్లి: కత్రినా కైఫ్

ముంబై: తాను మరో రెండేళ్లలో పెళ్లి చేసుకుంటానని బాలీవుడ్ నటి కత్రినా కైఫ్ అంటోంది. త్వరలో విడుదల కానున్న రాజనీతి చిత్రం ప్రమోషన్ లో బిజీగా ఉన్న ఆమె మీడియా ప్రతినిధులతో మాట్లాడింది. మరో రెండేళ్లలో పెళ్లి చేసుకోవాలని అనుకుంటున్నారని, రెండేళ్లంటే చాలా సమయం ఉన్నట్లేనని అంటూనే ఏమవుతుందో చూద్దాం, మనమొకటి తలిస్తే దైవం మరోటి తలుస్తాడని ఆమె అన్నది. సల్మాన్ ఖాన్ కు, కత్రినా కైఫ్ కు మధ్య ప్రేమాయణం నడుస్తున్నట్లు అందిరకీ తెలిసిందే.

తన గ్లామర్ ఇమేజ్ ను పక్కన పెట్టి కత్రినా రాజనీతిలో రాజకీయ నాయకురాలి పాత్ర పోషించింది. తన కెరీర్ లో ఈ చిత్రం ప్రత్యేకమైందని ఆమె అంటోంది. ప్రేక్షకులు ఆదరిస్తారని అనుకుంటున్నానని, తన కెరీర్ లో ఈ పాత్ర కొత్త అడుగు అని ఆమె అన్నది. కాంగ్రెసు అధ్యక్షురాలు సోనియా గాంధీపై ఆధారపడి తీసిందని వస్తున్న వార్తల్లో నిజం లేదని కత్రినా అంటోంది. భారతదేశంలో సోనియా గాంధీ అత్యంత స్ఫూర్తిదాయకమైన నాయకురాలని, వ్యక్తిగతంగా కూడా సోనియా తనకు స్ఫూర్తి అని, సినిమా కథ గానీ తన పాత్ర గానీ సోనియా గాంధీని దృష్టిలో పెట్టుకుని రూపుదిద్దుకోలేదని ఆమె వివరించింది.