ఒఎంసి తవ్వకాలపై స్టే యధాతథం

న్యూఢిల్లీ: కర్నాటక మంత్రి గాలి జనార్దన్ రెడ్డికి చెందిన ఓబుళాపురం మైనింగ్ కంపెనీ (ఒఎంసి) గనుల తవ్వకాలపై విధించిన స్టేను సుప్రీంకోర్టు పొడిగిస్తూ సోమవారం ఆదేశాలు జారీ చేసింది. గాలి జనార్దన్ రెడ్డికి చెందిన మరో రెండు గనుల తవ్వకాలపై విషయంలో ఆక్రమణలు జరిగాయనే ఆరోపణలపై కూడా సర్వే జరిపి ఈ నెల 22వ తేదీ లోగా నివేదిక సమర్పించాలని సుప్రీంకోర్టు సర్వే ఆఫ్ ఇండియాను ఆదేశించింది. కేసు విచారణను ఈ నెల 23వ తేదీకి వాయిదా వేసింది.

ఇంతకు ముందు సర్వే ఆఫ్ ఇండియా 68.5 హెక్టార్ల గనుల తవ్వకాలపై సర్వే చేసి నివేదిక సమర్పించింది. ఇందులో పెద్గగా ఆక్రమణలు జరగలేదని సర్వే ఆఫ్ ఇండియా స్పష్టం చేసింది. అందులో 2.5 హెక్టార్లు రోడ్డు కోసం వదలి, 66 హెక్టార్లలో తవ్వకాలు జరపాల్సి ఉండగా, మొత్తం 68.5 హెక్టార్లలో తవ్వకాలు జరిపారని తెలిపింది.