తెలంగాణ రాష్ట్రమే కావాలి: మధు యాష్కీ

న్యూఢిల్లీ: తెలంగాణ రాష్ట్ర ఏర్పాటు తప్ప మరో మార్గం లేదని కాంగ్రెసు తెలంగాణ పార్లమెంటు సభ్యుడు మధు యాష్కీ అన్నారు. కొత్త ఒప్పందాలకు, ప్యాకేజీలకు తెలంగాణ ప్రజలు ఆంగీకరించబోరని, తెలంగాణ రాష్ట్ర ఏర్పాటును మాత్రమే వారు కోరుకుంటున్నారని ఆయన శుక్రవారం మీడియా ప్రతినిధులతో అన్నారు. గత 40 ఏళ్లుగా ఒప్పందాలేవీ అమలు కాలేదని, కొత్త ఒప్పందాలు ఇస్తే నమ్మే పరిస్థితి లేదని ఆయన అన్నారు.

అన్ని సామాజిక వర్గాలు, కులాలు తెలంగాణ రాష్ట్ర ఏర్పాటును కోరుకుంటున్నట్లు ఆయన తెలిపారు. తాము కొత్త ఒప్పందాలు చేసుకుంటామంటే అంగీకరించే ప్రశ్నే లేదని ఆయన అన్నారు. రాష్ట్ర పరిస్థితిపై ఏర్పాటైన శ్రీకృష్ణ కమిటీ రాజకీయ పార్టీల అభిప్రాయాలకే కాకుండా తెలంగాణ ప్రజల అభిప్రాయానికి కూడా ప్రాధాన్యం ఇవ్వాలని ఆయన అన్నారు.