జగన్ ది దబ్బుల యాత్ర: గాలి ముద్దు

హైదరాబాద్‌: కాంగ్రెస్‌ ఎంపీ వైఎస్‌ జగన్‌ ఓదార్పుయాత్ర డబ్బుతో ముడిపడి ఉందని, అది జనానికి ఉపయోగపడేది కాదని తెదేపా సీనియర్‌ నేత గాలి ముద్దుకృష్ణమనాయుడు విమర్శించారు. జన సమీకరణకు ఆయన ఆవిష్కరిస్తున్న వైఎస్సార్‌ విగ్రహాలకు కూడా జగనే డబ్బులిస్తున్నారని ఆరోపించారు. ఓడిపోతాననే భయంతోనే తెరాస అధినేత కేసీఆర్‌ రాజీనామా చేయడం లేదన్నారు. ఎమ్మెల్యేలతో రాజీనామా చేయించి ఆయన చేయకపోవడమేమిటని ప్రశ్నించారు. ముద్దుకృష్ణనాయుడు శనివారం విలేకరులతో మాట్లాడారు.

తెరాసను కాంగ్రెస్‌లో విలీనం చేసి, కేంద్రంలో మంత్రి పదవి పొందాలనే ఆశతో కేసీఆర్‌ ఉన్నారని, అందుకే యూపీఏను తెలంగాణపై నిలదీయడం లేదని ఆయన విమర్శించారు. ముఖ్యమంత్రి రోశయ్య ఢిల్లీలో ప్రణాళికాసంఘాన్ని బతిమాలి పొగిడించుకుంటున్నారని విమర్శించారు. లేకుంటే నెలరోజుల్లోనే అభిప్రాయాలు ఎలా మారిపోతాయని ప్రశ్నించారు. నన్నపనేని విషయం ప్రశ్నించగా...పార్టీలో ఒకరిపై ఒకరం వ్యాఖ్యానించుకోబోమని, అంతా కలిసి కాంగ్రెస్‌పై పోరాడతామని బదులిచ్చారు.