అన్నవరం ఆలయానికి వాస్తు దోషం!

అన్నవరం: అన్నవరం సత్యదేవుని ఆలయానికి వాస్తు దోషం ఉందని కడప జిల్లాకు చెందిన ప్రముఖ వాస్తు సిద్ధాంతి నల్లపురెడ్డి హరిశ్చంద్రరెడ్డి తెలిపారు. దేవాలయానికి పశ్చిమాన ఉన్న రాజగోపురానికి పడమర నైరుతి వీధిపోటు, ఈశాన్య దిశలోని గోశాలను గుండ్రంగా ఉన్న స్థలంలో ఏర్పాటు చేయడం వల్ల దేవస్థానానికి కొన్ని సమస్యలు ఎదురయ్యే అవకాశముంద న్నారు. ఆదివారం సత్యదేవుని ఆలయానికి విచ్చేసిన ఆయన స్వామివారిని దర్శించారు. అనంతరం ఆలయాన్ని పరిశీలించి విలేకరులతో మాట్లాడారు.

స్వల్ప మార్పులు చేస్తే వాస్తు రీత్యా దేవస్థానం తిరుపతికి దీటుగా ఎదిగే అవకాశాలు పుష్కలంగా ఉన్నాయన్నారు. పడమరవైపు ఎత్తైన కొండలు, ఈశాన్యంలో పంపా రిజర్వాయర్‌ ఉండడం వల్ల ప్రతిఏటా భక్తుల సంఖ్యతో పాటు ఆదాయం కూడా భారీగా పెరుగుతుందన్నారు. అయితే పడమర నైరుతి వీధిపోటు ఉన్న రాజగోపురాన్ని, ఈశాన్యంలో గోశాల ఉన్న ప్రాంతాన్ని కొంత మార్చాల్సి ఉందన్నారు. తాను కడప జిల్లా పులివెందులలోని శ్రీరంగనాథస్వామి గుడి, గండి ఆంజనేయస్వామి గుడి, ఒంటిమిట్ట రామాలయం, కర్నూ లు జిల్లా మద్దిలేటి స్వామి ఆలయాలను పరిశీలించి కొన్ని మార్పులు సూచించానని వివరించారు.