తెలంగాణలో పర్యటించి తీరుతా: చిరంజీవి

హైదరాబాద్: తెలంగాణలో తాను పర్యటించి తీరుతానని, ఎవరు అడ్డుకుంటారో చూస్తానని ప్రజారాజ్యం పార్టీ అధ్యక్షుడు చిరంజీవి అన్నారు. సామాన్యులు ఎవరూ తనను అడ్డుకోరని, కొన్ని రాజకీయ పార్టీలు మాత్రమే అడ్డుకునే ప్రయత్నం చేస్తాయని ఆయన అన్నారు. పార్టీ కార్యవర్గ సమావేశంలో ఆయన బుధవారం మాట్లాడారు. తెలంగాణ ఏమైనా ఎల్ఓసినా అని ఆయన ప్రశ్నించారు. సమైక్యాంధ్ర నినాదంతో తాను తెలంగాణలో పర్యటించి తీరుతానని ఆయన అన్నారు. సమైక్యనినాదంతో తెలంగాణలో పర్యటిస్తానని ఆయన చెప్పారు.

వైఫల్యాలను కప్పి పుచ్చుకోవడానికి ప్రజారాజ్యం పార్టీ కాంగ్రెసులో విలీనమవుతుందనే ప్రచారం చేస్తున్నారని, అది గోబెల్స్ ప్రచారమని ఆయన అన్నారు. కాంగ్రెసు పార్టీలో తమ పార్టీని విలీనం చేసే ప్రసక్తి లేదని ఆయన అన్నారు. తమ పార్టీ వల్లనే తెలుగుదేశం పార్టీ అధికారంలోకి రాలేకపోయిందని, కాంగ్రెసు పార్టీ బొటాబొటీ మెజారిటీతో గెలిచిందని, ఆ రకంగా తాము శభాష్ అనిపించుకున్నామని ఆయన అన్నారు. మీడియాను అడ్డం పెట్టుకుని తమ పార్టీపై దుష్ప్రచారం చేస్తున్నారని ఆయన విమర్శించారు. పార్టీ నుంచి వెళ్లిపోయే వారు వెళ్లిపోవచ్చునని, ఉండేవారే నిజమైన నాయకులని ఆయన అన్నారు.

షార్ట్ కట్ లో రాష్టాన్ని దోచుకోవాలని కొందరు కోవర్టులు పార్టీలోకి వచ్చారని, వారే పార్టీని వదిలి వెళ్లిపోతున్నారని, శ్రేయోభిలాషులెవరూ పార్టీని వీడడం లేదని ఆయన అన్నారు.