వీడియో కాన్ఫరెన్స్ ద్వారా 'రాజు' విచారణ

హైదరాబాద్: సత్యం కంప్యూటర్స్ కుంభకోణంలో అనారోగ్య కారణాల వల్ల నిజాం వైద్య విజ్ఞాన సంస్థ (నిమ్స్)లో చికిత్స పొందుతున్న రామలింగరాజును వీడియో కాన్ఫరెన్స్ ద్వారా విచారణ జరిపేందుకు తాము సిద్ధంగా ఉన్నట్లు సిబిఐ అధికారులు శుక్రవారం హైదరాబాదులోని నాంపల్లి కోర్టుకు తెలిపారు. రామలింగ రాజు గత కొంత కాలంగా నిమ్స్ లో చికిత్స పొందుతున్నారు. ఆయన ఆరోగ్య పరిస్థితిని దృష్టిలో ఉంచుకుని వీడియో కాన్ఫరెన్స్ ద్వారా విచారించాలని సిబిఐ నిర్ణయించుకుంది.

కాగా, కేసు విచారణను కోర్టు ఈ నెల 30వ తేదీకి వాయిదా వేసింది. సత్యం కంప్యూటర్స్ కు చెందిన రికార్డులను అప్పగించాలని మహేంద్ర సత్యం వేసిన పిటిషన్ పై నాంపల్లి కోర్టు సానుకూలంగా ప్రతిస్పందించింది. సిబిఐ సమక్షంలో రికార్డు గదులను పరిశీంచడానికి కోర్టు అనుమతి ఇచ్చింది.