పవన్ కొమరం పులికి తెలంగాణ సెగ

హైదరాబాద్: ప్రముఖ సినీ నటుడు పవన్ కళ్యాణ్ కొమరం పులికి విడుదలకు ముందే తెలంగాణ సెగ తాకింది. సినిమా ప్రదర్శనను అడ్డుకుంటామని తెలంగాణ విద్యార్థి ఐక్య కార్యాచరణ సమితి (జెఎసి) హెచ్చరించింది. పవన్ కళ్యాణ్ అన్యయ్య, ప్రజారాజ్యం అధినేత చిరంజీవి తెలంగాణకు వ్యతిరేకంగా సమైక్యాంధ్ర నినాదాన్ని భుజాన మోయడాన్ని వ్యతిరేకిస్తూ కొమరం పులి సినిమా ప్రదర్శనను అడ్డుకోవాలని విద్యార్థి జెఎసి నిర్ణయించింది.

సినిమాకు కొమరం అనే పదాన్ని చేర్చడాన్ని కూడా తప్పు పడుతున్నారు. తెలంగాణ ప్రజల మనోభావాలను సొమ్ము చేసుకోవడానికి కొమురం భీంను స్ఫురింపజేస్తూ కొమరం పులి అని సినిమా పేరును మార్చుకున్నారని తెలంగాణవాదులు విమర్శిస్తున్నారు. సామాజిక తెలంగాణకు కట్టుబడి ఉంటామని చెప్పిన చిరంజీవి తెలంగాణకు వ్యతిరేకంగా వ్యవహరిస్తుండడాన్ని విమర్శిస్తున్నారు. చిరంజీవి కుటుంబ సభ్యుల సినిమాలను అడ్డుకుంటామని తెలంగాణవాదులు మొదటి నుంచీ చెబుతూ వస్తున్నారు.