అమెరికాలో భారత వైద్యుడి హత్య

వాషింగ్టన్‌: అమెరికాలోని యాలే స్కూల్‌ ఆఫ్‌ మెడిసిన్‌లో క్లినికల్‌ ఫెలోగా పని చేస్తున్న భారత డాక్టర్‌ విజీందర్‌ తూర్‌పై అతడి సహచరుడైన చైనా జాతీయుడు డాక్టర్‌ లిషాన్‌ వాంగ్‌ జరిపిన కాల్పులు జరిపాడు. ఈ కాల్పుల్లో తూర్‌ మరణించాడు. ఈసంఘటన జరిగినప్పుడు గర్భిణి అయిన తూర్‌ భార్య పక్కనే ఉన్నారు. అయితే, ఆమె ఈ కాల్పుల నుంచి తప్పించుకోగలిగారు. ఈ సంఘటన జరిగిన వెంటనే లిషాన్‌ వాంగ్‌ని పోలీసులు అరెస్టు చేశారు.తూర్‌ వయస్సు 34 సంవత్సరాలు కాగా, వాంగ్‌ వయస్సు 44 సంవత్సరాలు.వాంగ్‌ వద్ద ఆయుధాన్నీ, ఇతర వస్తువులను పోలీసు అధికారులు స్వాధీనం చేసుకున్నారు. వాంగ్‌ని మంగళవారంనాడు న్యూ హెవెన్‌ సుపీరియర్‌ కోర్టులో హాజరుపర్చారు.

తూర్‌, వాంగ్‌లు 2008లో బ్లూక్లిన్‌ లోని కింగ్స్‌ బ్రూక్‌ యూదుల ఆస్పత్రిలో పని చేశారు. తూర్‌ మాదిరిగానే వాంగ్‌ కూడా కింగ్స్‌బ్లూక్‌ మెడికల్‌ రెసిడెన్సీ శిక్షణకార్యక్రమంలో సభ్యుడు. ఈ శిక్షణ కార్యక్రమం 2006 జూలైలో ప్రారంభమైంది. అయితే, రెండేళ్ల తరువాత వాంగ్‌ని తొలగించారు. యూదుల ఆస్పత్రిలో ఉన్న వైద్యసిబ్బంది (తూర్‌ తో సహా) చైనీయులను వేధించిసూటిపోటి మాటలతో అవమానపర్చారని వాంగ్‌ ఆరోపించారు. అయితే, వాంగ్‌ తన విధులకు సక్రమంగా హాజరుకాకుండా ఇబ్బంది కలిగించేవాడని తూర్‌ ఫిర్యాదుచేశారు. ఒక గంట తరువాత వాంగ్‌ తూర్‌ తో వాగ్వాదానికి పాల్పడి బెదిరించాడు. దీనిపై వాంగ్‌ నుంచి తన ప్రాణానికి హాని ఉందని తూర్‌ ఫిర్యాదు చేశాడు. పాత కక్ష కారణంగానే తూర్‌ ని వాంగ్‌ కాల్చి చంపి నట్టు పోలీసులు నిర్ధారణకు వచ్చారు.