సెక్స్ వ్యాఖ్యలు: ఖుష్బూపై కేసుల కొట్టివేత

న్యూఢిల్లీ: సినీ నటి ఖుష్బూపై నమోదైన 22 క్రిమినల్ కేసులను సుప్రీంకోర్టు బుధవారం కొట్టేసింది. పెళ్లికి ముందు శృంగారం తప్పు కాదని చేసిన వ్యాఖ్యలకు గాను ఆమెపై తమిళనాడులో ఆ కేసులు నమోదయ్యాయి. వివిధ మ్యాగజైన్లకు ఇచ్చిన ఇంటర్వ్యూల్లో ఆమె 2005లో ఆ వ్యాఖ్యలు చేశారు. కేసులను కొట్టేయాలని తాను పెట్టుకున్న పిటిషన్ ను మద్రాసు హైకోర్టు తోసిపుచ్చడంపై ఆమె సుప్రీంకోర్టుకు వెళ్లారు. దీంతో ఆమెకు సుప్రీంకోర్టులో ఊరట లభించింది.

ఖుష్బూపై కేసులను ప్రధాన న్యాయమూర్తి కెజి బాలకృష్ణన్, జస్టిస్ దీపక్ వర్మలతో కూడిన బెంచ్ కొట్టేస్తూ బుధవారం తీర్పు చెప్పింది. ప్రతి వ్యక్తికీ భావప్రకటనా స్వేచ్ఛ ఉందని, ఓ వ్యక్తి మాట్లాడే మాటలను భూతద్దంలో చూపించడం సరి కాదని సుప్రీంకోర్టు వ్యాఖ్యానించింది. పెళ్లికి ముందు శృంగారం చట్టపరంగా తప్పు కాదని ఇదే కేసులో గతంలో ఓసారి సుప్రీంకోర్టు వ్యాఖ్యానించింది.