కెసిఆర్ ది అహంకార వైఖరి: శైలజానాథ్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుది అహంకారపూరిత వైఖరి అని కాంగ్రెసు సీమాంధ్ర శాసనసభ్యుడు శైలజానాథ్ వ్యాఖ్యానించారు. ఇంత వరకు అంతర్యుద్ధం వస్తుంది అంటూ వస్తున్న కెసిఆర్ ఇప్పుడు యుద్ధం మాట మాట్లాడుతున్నారని, దీన్ని బట్టి కెసిఆర్ కేంద్రం యుద్ధానికి సిద్ధపడుతున్నట్లు అర్థం చేసుకోవాల్సి ఉంటుందని ఆయన గురువారం మీడియా ప్రతినిధుల సమావేశంలో అన్నారు. ప్రజలను రెచ్చగొట్టి కెసిఆర్ పబ్బం గడుపుకుంటున్నారని ఆయన విమర్శించారు. తెలంగాణ సమస్యలపై మాట్లాడే నైతిక హక్కు కెసిఆర్ కు లేదని ఆయన అన్నారు.

తెలుగుదేశం పార్టీలో ఉన్నప్పుడు కెసిఆర్ మాట్లాడిన మాటలు ఇప్పుడు మాట్లాడుతన్న మాటలకు తెలంగాణ విషయంలో పొంతన లేదని ఆయన అన్నారు. కెసిఅర్ తన పార్టీ గురించి ఎన్ని గొప్పలైనా మాట్లాడుకోవచ్చునని, కానీ తమ కాంగ్రెసుపై మాట్లాడే హక్కు కెసిఆర్ కు లేదని ఆయన అన్నారు. తెలంగాణ విషయంలో శ్రీకృష్ణ కమిటీ ఏర్పాటు కావడానికి ప్రధాన కారణం తమ కాంగ్రెసు నాయకత్వంలోని యుపిఎ ప్రభుత్వమని ఆయన చెప్పారు.