కసబ్ పై తీర్పు పాక్ కు సందేశం: చిదంబరం

న్యూఢిల్లీ: ముంబై దాడుల కేసులో కసబ్ ను దోషిగా నిర్ధారిస్తూ ప్రత్యేక కోర్టు వెలువరించిన తీర్పుపై కేంద్ర హోం మంత్రి పి. చిదంబరం సంతృప్తి వ్యక్తం చేశారు. ఉగ్రవాదాన్ని ఎగుమతి చేయకూడదనే సందేశాన్ని కోర్టు తీర్పు పాకిస్తాన్ కు ఇస్తోందని ఆయన అన్నారు. పాకిస్తాన్ భారత్ లో ఉగ్రవాదల దాడులు చేస్తే అందుకు కారణమైనవారికి శిక్ష పడుతుందనే సందేశం పాక్ కు ఈ తీర్పు ద్వారా వెళ్తుందని ఆయన అన్నారు.

తగిన సాక్ష్యాధారాలు సేకరించి కేసు నెగ్గేలా చూసిన దర్యాప్తు సంస్థలను, ప్రాసిక్యూషన్ ను ఆయన అభినందించారు. కసబ్ కు తన నిర్దోషిత్వాన్ని నిరూపించుకోవడానికి ఇచ్చిన అవకాశం భారత్ చట్టప్రకారం వ్యవహరిస్తుందని చెప్పడానికి నిదర్శనమని ఆయన అన్నారు. నిర్దోషిత్వాన్ని నిరూపించుకోవడానికి కసబ్ కు పూర్తి అవకాశం ఇచ్చామని, బహిరంగ విచారణ జరిగిందని ఆయన అన్నారు.