పొన్నాలను అడ్డుకున్న తెలంగాణవాదులు

వరంగల్: ప్రజాపథం కార్యక్రమంలో పాల్గొనడానికి వచ్చిన భారీ నీటిపారుదల శాఖ మంత్రి పొన్నాల లక్ష్మయ్యను తెలంగాణవాదులు అడ్డుకున్నారు. ఈ సంఘటన సోమవారం వరంగల్ జిల్లాలోని చెన్నారావుపేట మండలం ఎల్లాయిగూడ గ్రామంలో చోటు చేసుకుంది. తన మంత్రిపదవికి పొన్నాల లక్ష్మయ్య రాజీనామా చేయాలని తెలంగాణవాదులు డిమాండ్ చేశారు. పొన్నాల గో బ్యాక్ అంటూ నినాదాలు చేశారు. ఈ సమంయంలో పోలీసులకు, తెలంగాణవాదులకు మధ్య వాగ్వివాదం, తోపులాట చోటు చేసుకుంది. దీంతో స్వల్ప ఉద్రిక్తత నెలకొంది.

కాగా, మంత్రి వెనక్కి తిరిగి వెళ్లిపోవాలని, ముందుస్తుగా అరెస్టు చేసిన తెలంగాణవాదులను విడుదల చేయాలని డిమాండ్ చేస్తూ ఓ వ్యక్తి వాటర్ ట్యాంక్ ఎక్కాడు. ఆత్మహత్య చేసుకుంటానని బెదిరించాడు. పొన్నాల పర్యటన నేపథ్యంలో పోలీసులు మందుస్తుగా పలువురిని అదుపులోకి తీసుకున్నారు. అయినా మంత్రి ఆ చేదు అనుభవం తప్పలేదు.