భారత నిందితులపై అప్పీల్ చేస్తాం: నికం

ముంబై: ముంబై దాడుల కేసు నుంచి ప్రత్యేక కోర్టు చేత విముక్తి పొందిన బారతీయ నిందితులు ఫహీం అన్సారీ, సబావుద్దీన్ లపై అపీల్ కు వెళ్తామని ప్రభుత్వ తరఫు న్యాయవాది ఉజ్వల్ నికం చెప్పారు. ముంబై దాడులకు ఉగ్రవాదులకు సహకరించారని వారిపై అభియోగాలు మోపారు. అయితే, ముంబై మ్యాప్ లు కలిగి ఉన్నంత మాత్రాన వారిని దోషులుగా ప్రకటించలేమని ప్రత్యేక కోర్టు తెలిపింది. అన్సారీ, సబావుద్దీన్ లపై ప్రత్యేక కోర్టు వెలువరించింది తుది తీర్పు కాదని ఆయన అన్నారు. వారిని నిర్దోషులుగా ప్రకటించడం తీవ్ర నిరాశకు గురి చేసిందని ఆయన చెప్పారు.

అన్సారీ, సబావుద్దీన్ బెంగళూర్, రాంపూర్ కాల్పుల కేసుల్లో నిందితులని ఆయన చెప్పారు. కసబ్ ను అన్ని అభియోగాల్లో దోషిగా కోర్టు నిర్ధారించినట్లు ఆయన తెలిపారు. తీర్పు అనంతరం ఆయన సోమవారం మీడియా ప్రతినిధులతో మాట్లాడారు. కసబ్ కు కఠిన శిక్ష విధించాలని తాను కోరుతానని ఆయన చెప్పారు. ఏడుగురి హత్య కేసులో కూడా కసబ్ దోషిగా నిలిచాడని ఆయన చెప్పారు.